4 முறை சாம்பியனை வீட்டிற்கு அனுப்பிய குட்டி நாடு - ஜெர்மனியை வீழ்த்தி பராகுவே கொடுத்த மாஸ் வெற்றி!

FIFA உலகக் கோப்பை தொடரின் ரவுண்ட் ஆஃப் 32 சுற்றில் கால்பந்து உலகையே அதிர்ச்சியில் ஆழ்த்தும் முடிவு அரங்கேறியது. நான்கு முறை உலக சாம்பியனான ஜெர்மனியை எதிர்கொண்ட பராகுவே, கடைசி வரை போராடி பெனால்டி ஷூட் அவுட்டில் 4-3 என்ற கணக்கில் வெற்றி பெற்று காலிறுதிக்கு முன்னேறியது.

வழக்கமான 90 நிமிடங்களும், கூடுதல் நேரமும் முடிவில் இரு அணிகளும் 1-1 என்ற கோல் கணக்கில் சமநிலையில் இருந்ததால், வெற்றியாளர் பெனால்டி ஷூட் அவுட்டில் தீர்மானிக்கப்பட்டது. ஆட்டத்தின் முதல் பாதியில் இரு அணிகளும் சமபலத்துடன் விளையாடிய நிலையில், 42-வது நிமிடத்தில் ஜூலியோ என்சிசோ தலையால் அடித்த கோல் மூலம் பராகுவே முன்னிலை பெற்றது. இந்த கோல் ஜெர்மனிக்கு அதிர்ச்சியை ஏற்படுத்தியது.

இரண்டாம் பாதியில் பதிலடி கொடுத்த ஜெர்மனி, 54-வது நிமிடத்தில் கை ஹாவெர்ட்ஸ் அடித்த கோலால் போட்டியை 1-1 என சமன் செய்தது. அதன்பிறகு இரு அணிகளும் வெற்றி கோலுக்காக கடுமையாக போராடினாலும், கூடுதல் நேரம் வரை எந்த அணியாலும் கோல் அடிக்க முடியவில்லை.

கூடுதல் நேரத்தின் இறுதியில் ஜெர்மனியின் ஜொனாதன் டா கோல் அடித்தார். ஆனால் VAR பரிசீலனைக்குப் பிறகு அந்த கோல் ஆஃப்சைடு காரணமாக ரத்து செய்யப்பட்டது. ஜெர்மனிக்கு கிடைத்த மிகப்பெரிய வாய்ப்பு பறிபோனதால், போட்டி பெனால்டி ஷூட் அவுட்டுக்கு சென்றது.

அங்கு பராகுவே கோல் கீப்பர் ஆர்லாண்டோ கில் அபாரமாக செயல்பட்டு இரண்டு பெனால்டிகளை தடுத்து அணியின் வெற்றிக்கு முக்கிய காரணமாக அமைந்தார். இறுதியாக ஜோசே கனாலே வெற்றி பெனால்டியை கோலாக மாற்றியதும் பராகுவே வீரர்களும் ரசிகர்களும் கொண்டாட்டத்தில் மூழ்கினர்.

இந்த தோல்வியின் மூலம் உலகக் கோப்பை வரலாற்றில் முதல் முறையாக பெனால்டி ஷூட் அவுட்டில் ஜெர்மனி தோல்வியை சந்தித்துள்ளது என்பது குறிப்பிடத்தக்கது.

மேலும், 2014-ல் உலகக் கோப்பையை வென்ற பிறகு மீண்டும் ஒரு முறை நாக்அவுட் சுற்றிலேயே வெளியேறிய ஜெர்மனி ரசிகர்களுக்கு இந்த தோல்வி பெரும் ஏமாற்றத்தை ஏற்படுத்தியுள்ளது.மறுபுறம், 16 ஆண்டுகளுக்குப் பிறகு உலகக் கோப்பை தொடருக்கு திரும்பிய பராகுவே, உலகின் முன்னணி அணிகளில் ஒன்றான ஜெர்மனியை வெளியேற்றி இந்த உலகக் கோப்பையின் மிகப்பெரிய அதிர்ச்சியை பதிவு செய்துள்ளது.

இந்த வரலாற்று வெற்றியை கொண்டாடும் வகையில் பராகுவே அரசு நாடு முழுவதும் பொது விடுமுறை அறிவித்துள்ளது. உலகக் கோப்பையில் இந்த வெற்றி, பராகுவே கால்பந்து வரலாற்றில் மிகப்பெரிய சாதனையாக பார்க்கப்படுகிறது.