”தமிழ்நாட்டினுள் CAA-வை கால்வைக்க விடமாட்டோம்” : முதலமைச்சர் மு.க.ஸ்டாலின் திட்டவட்டம்!

பா.ஜ.க தலைமையிலான ஒன்றிய அரசு 2019ம் ஆண்டு குடியுரிமை திருத்த சட்டம் (CAA) நாடாளுமன்றத்தில் தாக்கல் செய்து நிறைவேற்றியது. இதற்கு நாடு முழுவதும் கடும் எதிர்ப்புகள் எழுந்தது. இதனால் இந்த சட்டத்தை ஒன்றிய அரசு நடைமுறை படுத்தாமல் இருந்து வந்தது.

இந்நிலையில் வரும் நாடாளுமன்ற தேர்தலுக்கு முன்பாக CAA சட்டம் நடைமுறை படுத்தப்படும் என ஒன்றிய அமைச்சர் சாந்தனு தாக்குர் அண்மையில் தெரிவித்திருந்தார்.

இதையடுத்து ஒன்றிய அரசின் முடிவிற்கு மாநில முதலமைச்சர்கள் கடும் எதிர்ப்புகளை தெரிவித்து வருகிறார்கள். இந்நிலையில் தமிழ்நாட்டினுள் CAAவை கால்வைக்க விடமாட்டோம் என தமிழ்நாடு முதலமைச்சர் மு.க.ஸ்டாலின் திட்டவட்டமாக தெரிவித்துள்ளார்.

இது குறித்து தமிழ்நாடு முதலமைச்சர் மு.க.ஸ்டாலின் வெளியிட்டுள்ள சமூகவலைதள பதிவில், ஏழு நாட்களில் மேற்கு வங்கம் மட்டுமல்லாது இந்தியா முழுவதும் CAA நடைமுறைப்படுத்தப்படும் என்று கூறியிருக்கிறார் பா.ஜ.க.வைச் சேர்ந்த ஒன்றிய இணையமைச்சர் ஒருவர்.

இலங்கைத் தமிழர்களுக்கும் இசுலாமியர்களுக்கும் எதிரான CAB சட்டம் ஆனதற்கு முழுமுதற்காரணமே நாடாளுமன்றத்தில் அ.தி.மு.க ஆதரித்து வாக்களித்ததுதான்.

அப்போது எதிர்க்கட்சியாக இருந்தாலும் தோழமை இயக்கங்களுடன் இணைந்து மிகப் பெரிய அளவில் போராட்டங்களை நடத்தியதுடன் இரண்டு கோடிப் பேரிடம் கையெழுத்து பெற்று அதனைக் குடியரசுத் தலைவருக்கு அனுப்பி வைத்தது கழகம்.

2021-இல் ஆட்சிக்கு வந்த உடனே CAAவைத் திரும்பப் பெற வலியுறுத்திச் சட்டமன்றத்தில் தீர்மானமே நிறைவேற்றினோம். தமிழ்நாட்டில் குடியுரிமைத் திருத்தச் சட்டம் நடைமுறைப்படுத்தப்படுவதைத் தி.மு.க அரசு ஒருபோதும் அனுமதிக்காது.

மதநல்லிணக்கத்துக்கு எதிரான பா.ஜ.க. அரசின் நாசகாரச் செயல்களையும், அதற்குத் துணைபோகும் அ.தி.மு.க.வின் நயவஞ்சக நாடகங்களையும் நாட்டு மக்கள் பார்த்துக் கொண்டுதான் இருக்கிறார்கள். உறுதியாகச் சொல்கிறேன். தமிழ்நாட்டினுள் CAAவை கால்வைக்க விடமாட்டோம்" என தெரிவித்துள்ளார்.