"BCCI பணத்தால் அனைத்தையும் சாதிக்க நினைப்பது கிரிக்கெட் நேர்மைக்கே எதிரானது"-பாக். முன்னாள் வீரர் காட்டம்

கடந்த 2008-ம் ஆண்டு மும்பை தாக்குதலுக்கு பின்னர் இந்தியா பாகிஸ்தான் இடையே மோதல்போக்கு நிலவி வருகிறது. அதன்பின்னர் இந்திய அணி பாகிஸ்தான் சென்று விளையாட தொடர்ந்து மறுப்பு தெரிவித்து வருகிறது. அதேபோல அரசியல் காரணங்களுக்காக இரு நாடுகள் இடையே எந்த தொடரும் நடைபெறவில்லை. ஐசிசி நடத்தும் தொடரில் மட்டுமே இரு அணிகளும் விளையாடி வருகிறது.

சமீபத்தில் ஐக்கிய அரபு அமீரகத்தும் ஆசிய கோப்பை தொடர் நடந்து முடிந்தது. அதைத் தொடர்ந்து அடுத்த ஆசிய கோப்பை தொடர் பாகிஸ்தானில் நடைபெறவுள்ளது. அதில் இந்தியா கலந்துகொள்ளுமா என்ற மிகப்பெரிய கேள்வி ஒன்று நிலவு வந்தது.

இந்த சூழலில் 2022-2023 ஆம் ஆண்டிற்கான பிசிசிஐ பொதுக்குழு கூட்டத்தில் அடுத்த ஆண்டு பாகிஸ்தானில் நடைபெற உள்ள ஆசிய கோப்பை தொடரை வேறு பொதுவான இடத்திற்கு மாற்ற சர்வதேச கிரிக்கெட் கவுன்சிலான ஐசிசி-யிடம் கோரிக்கை வைக்க முடிவு செய்யப்பட்டது. அந்த கோரிக்கை நிறைவேற்றப்படவில்லை என்றால் அடுத்த ஆண்டு பாகிஸ்தானில் நடைபெறும் தொடரில் இந்திய அணி பங்கேற்க வேண்டாம் எனவும் முடிவு செய்யப்பட்டது.

அதனைத் தொடர்ந்து பாகிஸ்தான் கிரிக்கெட் வாரியம் வெளியிட்டுள்ள அறிக்கையில், " ஆசிய கோப்பை தொடரை வேறு இடத்திற்கு மாற்ற வேண்டுமென ஒருதலைபட்சமாக பிசிசிஐ கருத்து தெரிவித்துள்ளது 2023 ஐசிசி கிரிக்கெட் உலகக் கோப்பை மற்றும் 2024-2031 சுழற்சியில் இந்தியாவில் நடைபெறவிருக்கும் ஐசிசி தொடர்களின் பாகிஸ்தான் பங்கேற்பதை இக்கருத்துகள் பாதிக்கலாம்." என தெரிவிக்கப்பட்டது.

அதோடு அப்போதைய பாகிஸ்தான் கிரிக்கெட் வாரிய தலைவர் ரமீஸ் ராஜா ஆசிய கோப்பைக்கு இந்திய அணி பாகிஸ்தானுக்கு வரவில்லை என்றால்,இந்தியாவில் நடைபெறூம் உலகக் கோப்பைக்கு பாகிஸ்தான் அணி இந்தியாவுக்குப் பயணம் செய்ய மாட்டார்கள் எனவும் எச்சரிக்கை விடுத்தார்.

இந்த நிலையில், இந்த சம்பவத்தை குறிப்பிட்டு BCCI பணத்தால் அனைத்தையும் சாதிக்க நினைப்பது கிரிக்கெட்டின் நேர்மை தன்மைக்கு எதிரானது என பாகிஸ்தான் முன்னாள் வீரர் மொயின் கான் கூறியுள்ளார். இது தொடர்பாக பேசிய அவர், "பாகிஸ்தானுக்கு இந்தியா ஏன் வர மறுக்கிறது என்பதில் தீர்வு காண்பதற்கான பேச்சு வார்த்தை நடைபெற வேண்டும். ஒருவேளை ஆசியக் கோப்பையில் பங்கேற்க இந்தியா வராமல் போனால் பாகிஸ்தானும் உலகக் கோப்பையில் பங்கேற்க செல்லக் கூடாது.

ஒருவேளை இந்தியா தன்னுடைய ஆசிய கோப்பை போட்டிகளை பொதுவான இடத்தில் விளையாடினால் பாகிஸ்தானும் தன்னுடைய உலகக் கோப்பை போட்டிகளை பொதுவான இடத்தில் விளையாட வேண்டும். பணத்தை அடிப்படையாக வைத்து நீங்கள் இவற்றில் செயல்பட்டால் நிச்சயமாக தீர்வு கிடைக்காது. BCCI பணத்தால் அனைத்தையும் சாதிக்க நினைப்பது கிரிக்கெட்டின் நேர்மை தன்மைக்கு எதிரானது" என்று கூறியுள்ளார்.