”இந்தித்திணிப்பு, மும்மொழிக் கொள்கையை திராவிட மாடல் அரசு ஒரு போதும் ஏற்காது”: துணை முதலமைச்சர் உதயநிதி!

தமிழ்நாட்டில் மும்மொழிக் கொள்கையை திணிக்கத்துடிக்கும் ஒன்றிய பாசிச பாஜக அரசை கண்டித்து, தி.மு.கழகம் தலைமையிலான கூட்டணி சார்பில் இன்று சென்னையில் மாபெரும் கண்டன ஆர்ப்பாட்டம் நடைபெற்றது.

இதில் துணை முதலமைச்சர் உதயநிதி ஸ்டாலின் கலந்து கொண்டு கண்டன உரையாற்றினார். அப்போது பேசிய அவர், ”அன்புக்கு கட்டுப்பட்டவர்கள் தமிழர்கள். ஆனால் அடக்குமுறைக்கு பயப்பட மாட்டோம், அஞ்சமாட்டோம். இது ஒன்றிய பாசிச பா.ஜ.க அரசுக்கு புரிய வேண்டும் என்பதற்கான அடையாளம்தான் இந்த ஆர்ப்பாட்டம்.

இந்தியை ஏற்காததால் தமிழ்நாட்டிற்கு வரவேண்டிய ரூ.2190 கோடி நிதியை உத்தர பிரதேசம், குஜராத் மாநிலங்களுக்கு பிரித்து கொடுத்துள்ளது ஒன்றிய அரசு. மேலும் மும்மொழி கொள்கையை ஏற்றுக்கொண்டால்தான் நிதி ஒதுக்க முடியும் என ஒன்றிய அமைச்சர் தர்மேந்திர பிரதான் மிரட்டுகிறார்.

நாங்கள் ஒன்னும் உங்க அப்பன் வீட்டு காச கேட்கவில்லை. நாங்கள் பிச்சை,கடன் கேட்கவில்லை. தமிழ்நாட்டு மாணவர்களின் பெற்றோர்கள் கட்டிய வரிப்பணத்தைதான் நாங்கள் கேட்கிறோம். உங்கள் மிரட்டலுக்கு தமிழ்நாடு அஞ்சாது. இது திராவிட மண்.

நீங்கள் சொல்லும் இடத்தில் எல்லாம் கையெழுத்து இட இது அடிமை ஆட்சி அல்ல. இது முத்துவேல் கருணாநிதி மு.க.ஸ்டாலின் அவர்களால் சுயமரியாதையுடன் வழிநடத்தப்படும் திராவிட மாடல் அரசு. தமிழ்நாடு என்றைக்கும் மும்மொழி கொள்கையை ஏற்காது. இங்கு இருமொழி கொள்கைதான். எங்களை மீண்டும் மீண்டும் மிரட்டி பார்க்க வேண்டாம். அதை எப்படி எதிர்கொள்ள வேண்டும் என்று எங்களுக்கு தெரியும்.

கட்சி பெயரில் அண்ணாவையும், திராவிடத்தையும் வைத்துக் கொண்டு இந்த பிரச்சனையில் ஒதுங்கி நிர்காதீர்கள். வேடிக்கை பார்க்காதீர்கள். கட்சி எல்லைக்கு அப்பாற்பட்டு ஒட்டுமொத்த தமிழ்நாடும் ஓரணியில் நின்று, மும்மொழி கொள்கையை எதிர்க்க வேண்டும். தமிழ்நாட்டிற்கு தர வேண்டிய நிதியை விரைவில் வழங்கவில்லை என்றால் இந்த ஆர்ப்பாட்டம், தமிழ்நாடு முழுவதும் போராட்டமாக மறுவதும் மாறாததும் ஒன்றிய பாசிச பா.ஜ.க அரசின் கையில்தான் உள்ளது.

பிரதமர் மோடி அவர்களே நீங்கள் சென்ற முறை எங்களின் உரிமைகளை பரித்தபோது தமிழ்நாட்டு மக்கள் உங்களை Go Back மோடி என்று சொல்லி துரத்தி அடித்தார்கள். இதை மீண்டும் தமிழ்நாட்டு மக்களிடம் முயற்சி செய்தால் இந்தமுறை Go Back மோடி கிடையாது. Get Out மோடி என்று சொல்லி உங்களை விரட்டியடிப்பார்கள்.” என தெரிவித்துள்ளார்.