பெண்களுக்கு எதிரான குற்றங்கள் : தண்டனைகளை அதிகரிக்கும் மசோதா சட்டமன்றத்தில் தாக்கல் : விவரம் உள்ளே !

நடைபெற்று வரும் தமிழ்நாடு சட்டமன்றப் பேரவையில் பெண்களுக்கெதிரான குற்றங்களைத் தடுக்கும் வகையில் இரண்டு சட்டமுன்வடிவுகளை முதலமைச்சர் தாக்கல் செய்தார். இந்த நிலையில், அந்த சட்டத்திருத்தம் குறித்த விவரங்கள் வெளியாகியுள்ளது.

• பாலியல் வன்புணர்ச்சிக்கு முன்னர் குறைந்தபட்சம் 10 ஆண்டுகள் சிறை விதிக்கப்பட்ட நிலையில், தற்போது குறைந்தபட்சம் 14 ஆண்டுகள் சிறை விதிக்க புதிய சட்டம் வழிவகை செய்கிறது.

• நெருங்கிய உறவினர் (அ) காவல்துறை ஊழியர் பாலியல் வன்புணர்ச்சியில் ஈடுபட்டால் முன்னர் குறைந்தபட்சம் 10 ஆண்டுகள் சிறை தண்டனை வைக்கப்பட்ட நிலையில், தற்போது குறைந்தபட்சம் 20 ஆண்டுகள் சிறை விதிக்க புதிய சட்டம் வழிவகை செய்கிறது.

• 12 வயதுக்குட்பட்ட சிறுமி மீது பாலியல் வன்புணர்ச்சியில் ஈடுபட்டால் முன்னர் குறைந்தபட்சம் 20 ஆண்டுகள் சிறை (அ) ஆயுள் தண்டனை (அ) மரண தண்டனை விதிக்கப்பட்ட நிலையில், தற்போது ஆயுள் (அ) மரண தண்டனை விதிக்க புதிய சட்டம் வழிவகை செய்கிறது.

• பாலியல் வன்புணர்ச்சி மற்றும் மரணத்தை விளைவிக்கும் குற்றத்துக்கு முன்னர் குறைந்தபட்சம் 20 ஆண்டுகள் சிறை விதிக்கப்பட்ட நிலையில், தற்போது ஆயுள் தண்டனை விதிக்க புதிய சட்டம் வழிவகை செய்கிறது.

• கூட்டுப் பாலியல் வன்புணர்ச்சி குற்றத்துக்கு முன்னர் ஆயுள் தண்டனை விதிக்கப்பட்ட நிலையில், தற்போது மரண தண்டனை விதிக்க புதிய சட்டம் வழிவகை செய்கிறது.

• மீண்டும் மீண்டும் குற்றம் இழைத்தவர்களுக்கு குற்றத்துக்கு முன்னர் ஆயுள் தண்டனை விதிக்கப்பட்ட நிலையில், தற்போது மரண தண்டனை விதிக்க புதிய சட்டம் வழிவகை செய்கிறது.

• பாலியல் தொல்லையில் ஈடுபட்டவர்களுக்கு முன்னர் 3 ஆண்டுகள் சிறை தண்டனை விதிக்கப்பட்ட நிலையில், தற்போது 5 ஆண்டுகள் விதிக்க புதிய சட்டம் வழிவகை செய்கிறது.

• பெண்ணை பின் தொடர்தலுக்கு முன்னர் தண்டனை கிடையாதுஎன்ற நிலையில், தற்போது முதல் முறை 5 ஆண்டுகள் சிறை தண்டனை , 2வது முறை 7 ஆண்டுகள் சிறை தண்டனை விதிக்க புதிய சட்டம் வழிவகை செய்கிறது.

• ஆசிட் வீச்சு குற்றத்துக்கு முன்னர் 10 ஆண்டு சிறை முதல் அதிகபட்சம் ஆயுள் தண்டனை விதிக்கப்பட்ட நிலையில், தற்போது ஆயுள் (அ) மரண தண்டனை விதிக்க புதிய சட்டம் வழிவகை செய்கிறது.

• ஆசிட் வீச முயற்சித்தல் குற்றத்துக்கு முன்னர் 5 முதல் 7 ஆண்டுகள் வரை சிறை தண்டனை விதிக்கப்பட்ட நிலையில், தற்போது 10 ஆண்டு சிறை முதல் அதிகபட்சம் ஆயுள் தண்டனை விதிக்க புதிய சட்டம் வழிவகை செய்கிறது.