"மக்களின் நம்பிக்கையை மீட்டெடுக்க ஒன்றிய அரசு எடுத்த நடவடிக்கை என்ன ?" - திமுக MP தயாநிதி மாறன் கேள்வி !

மக்களின் நம்பிக்கையை மீட்டெடுக்கவும், உயர்கல்வி நிறுவனங்களின் மதிப்பீட்டில் வெளிப்படைத் தன்மையை உறுதிப்படுத்தவும் ஒன்றிய அரசு எடுக்கும் நடவடிக்கைகள் என்ன? என நாடாளுமன்றத்தில் திமுக எம்.பி. தயாநிதி மாறன் கேள்வி எழுப்பியுள்ளார் .

இது குறித்து வெளியிடப்பட்ட அறிக்கையில், "தேசிய மதிப்பீடு மற்றும் தரச்சான்று அவை (NAAC) மூலம் பல கல்வி நிறுவனங்கள் தங்களுக்கு உயர் தரச்சான்று பெறுவதற்கு முறைகேடுகள் செய்ததாக புகார்கள் வந்துள்ளனவா? மேலும், NAAC-லிருந்து சுமார் 20% மதிப்பீட்டாளர்கள் நீக்கப்பட்டுள்ளனரா? அப்படியானால், அதன் விவரங்கள் என்ன? கடந்த மூன்று ஆண்டுகளில் தரவரிசை பெறத் தவறிய கல்வி நிறுவனங்களின் எண்ணிக்கை எவ்வளவு?

கடந்த மூன்று ஆண்டுகளில் தரவரிசை பெறத் தவறிய கல்வி நிறுவனங்களின் மொத்த எண்ணிக்கை, ஆண்டு வாரியாக எவ்வளவு?

மக்களின் நம்பிக்கையை மீட்டெடுக்கவும், உயர்கல்வி நிறுவனங்களின் மதிப்பீட்டில் வெளிப்படைத் தன்மையை உறுதிப்படுத்தவும் அரசு எடுக்கும் நடவடிக்கைகள் என்ன?

தரவரிசை முறை மற்றும் சான்றுரை அடிப்படையிலான மதிப்பீடுகளை அதிகம் சார்ந்திருப்பதால் ஏற்படும் பாதிப்புகளை, குறிப்பாக மனிதவியல் மற்றும் சமூக அறிவியல் துறைகளில், அரசு ஆய்வு செய்துள்ளதா? அப்படியானால், அதன் விவரங்கள் என்ன?

மதிப்பெண் அடிப்படையிலான மதிப்பீடுகளுக்கு பதிலாக, சக மதிப்பாய்வு செய்யப்பட்ட, சூழல் உணர்திறன் மற்றும் துறை சார்ந்த மதிப்பீட்டு முறைகளை அறிமுகப்படுத்த அரசு திட்டமிடுகிறதா?

உயர்கல்விக்கான பொது நிதியை அதிகரிக்கவும், மானியங்கள், ஒப்புதல்கள் மற்றும் அங்கீகாரத்திற்கான தரவரிசையில், ஒழுங்குமுறை ஆணையத்தின் சார்புநிலையைக் குறைக்கவும் ஒன்றிய அரசிடம் ஏதேனும் திட்டம் உள்ளதா?

அப்படியானால், அதன் விவரங்கள் மற்றும் அது எப்போது நடைமுறைக்கு வரும்? இல்லையெனில், அதற்கான காரணங்கள் என்ன?"என்று கூறப்பட்டுள்ளது.