விஜய்யின் அடுத்த படத்திலும் யோகிபாபு? - உறுதியானது 4வது முறையாக கூட்டணி!

தமிழ் சினிமா காமெடி நடிகர்களில் இப்போது லீடிங்கில் இருப்பது யோகிபாபுதான். ரஜினி, விஜய், அஜித் என முன்னணி நடிகர்கள் எல்லாருடைய படங்களிலும் நடித்திருக்கிறார். சமீபத்தில் இவர் லீட் ரோலில் நடித்து நெட்ஃப்ளிக்ஸில் வெளியான `மண்டேலா' படம் பெரிய அளவில் பேசப்பட்டது.

முதன்முறையாக யோகிபாபுவை ஒரு முழு நீளப் படத்தில் குணச்சித்திர கதாபாத்திரமாக ரசிகர்கள் வரவேற்றிருக்கிறார்கள். தொடர்ந்து தனுஷின் `கர்ணன்' படத்திலும் யோகிபாபுவுடைய ரோல் பெரிய வரவேற்பை பெற்றது. அஜித் உடன் வீரம், வேதாளம், விஸ்வாசம்' என மூன்று படங்களில் நடித்தவர் `வலிமை' படத்திலும் நடித்திருக்கிறார். ரஜினியுடன் `அண்ணாத்த' படத்திலும் நடிக்கிறார் எனக் கூறப்படுகிறது.

இதைத் தொடர்ந்து விஜய் நடிப்பில் நெல்சன் இயக்கும் படத்திலும் நடிப்பதாக ஒரு பேட்டியில் உறுதிப்படுத்தியிருக்கிறார் யோகிபாபு. நெல்சன் இயக்கிய முதல் படம்`கோலமாவு கோகிலா' படத்திலும் யோகிபாபு முக்கியமான கதாபாத்திரத்தில் நடித்திருந்தார். விஜய் உடன் மெர்சல், சர்கார், பிகில் படங்களைத் தொடர்ந்து, இந்தப் படத்தில் நான்காவது முறையாக விஜய்யுடன் நடிக்கிறார். தொடர்ந்து காமெடியன், லீட் ரோல் என படு பிஸியாக நடித்துக் கொண்டிருக்கிறார் யோகிபாபு.