ஹீரோ அவதாரம் எடுத்த லெஜென்ட் சரவணா: சென்னையில் பூஜையுடன் தொடங்கியது படம் (Photos)

சரவண ஸ்டோர்ஸ் உரிமையாளர்களில் ஒருவரான லெஜெண்ட் அருள் நடிக்கும் படத்தின் பூஜை இன்று தொடங்கியது.

தியாகராய நகர் முதல் சென்னையின் பல பகுதிகளில் கிளை பரப்பி இயங்கி வருகிறது சரவண ஸ்டோர்ஸ். இதன் உரிமையாளர்களில் ஒருவரான அருள், சமீப காலங்களாக சரவண ஸ்டோர்ஸின் விளம்பரங்களில் நடித்து பிரபலமானவர்.

தற்போது இவர், சினிமாவிலும் களமிறங்க தொடங்கிவிட்டார். விளம்பர படங்களில் லெஜெண்ட் சரவண ஸ்டோர்ஸுன் அருளை பெஸ்ட் பெஸ்ட் என ஆட வைத்த ஜேடி மற்றும் ஜெர்ரி ஆகியோரே அவரது முதல் படத்தை இயக்குகின்றனர்.

பெயர் சூட்டப்படாத இந்த படத்தின் பூஜை சென்னையில் உள்ள ஏவிஎம் ஸ்டூடியோவில் இன்று நடைபெற்றது. இதில், ஏவிஎம் சரவணன், நடிகர் பிரபு, விவேக் உள்ளிட்ட பலர் கலந்து கொண்டனர்.

லெஜெண்ட் அருள் நடிக்கும் இந்த படத்துக்கு தமிழ் சினிமாவின் முன்னணி கதாநாயகிகளின் கால்ஷீட் கிடைக்காததால் புதுமுக நாயகியாக ஜீத்திகா திவாரி எனும் மாடல் அழகியை ஹீரோயினாக்கியுள்ளது படக்குழு.

மேலும், இந்த படத்துக்கு ஹாரிஸ் ஜெயராஜ் இசையமைக்க, வேல்ராஜ் ஒளிப்பதிவு செய்ய, ஆண்டனி ரூபன் படத்தொகுப்பு பணிகளை மேற்கொள்கிறார்.

பட பூஜை தொடர்பான புகைப்படங்கள் இணையத்தில் வைரலானது மட்டுமல்லாமல் சரவணா ஸ்டோர்ஸ் அருள் மற்றும் படக்குழுவினருக்கு வாழ்த்துகளும் குவிந்து வருகிறது.