தெலங்கானாவில் காங்கிரஸ் எம்.எல்.ஏ.கள் 12 பேர் ஆளும் ராஷ்டிரிய சமிதியில் இணைய முடிவு!

தெலங்கானாவில் தற்பொழுது ஆட்சியில் இருக்கும் தெலங்கானா ராஷ்டிரிய சமிதி கட்சித் தலைவர் சந்திரசேகர ராவ், தனது அரசின் பதவிக்காலம் முடிய 9 மாதங்கள் இருந்த நிலையில், ஆட்சியை கலைத்து, தேர்தலை சந்தித்தார்.

அதனையடுத்து கடந்த வருடம் டிசம்பர் மாதம் 7-ம் தேதி, தெலுங்கானாவில் சட்டமன்ற தேர்தல் நடைபெற்றது. 119 சட்டப்பேரவை தொகுதிகளை கொண்ட தெலங்கானாவில் ஆட்சி அமைக்க 60 தொகுதிகளில் வெற்றி பெற வேண்டும். ஆளும் தெலுங்கானா ராஷ்டிர சமிதி 88 தொகுதிகளில் வெற்றி பெற்றது.

காங்கிரஸ் கூட்டணி 20 இடங்களிலும், பா.ஜ.க 2 இடங்களிலும் வெற்றி பெற்றுன. பெரும்பான்மையை விட அதிக இடங்களில் வெற்றி பெற்றதால், தொடர்ந்து 2-வது முறையாக சந்திரசேகர ராவ் முதல்வராக பதவியேற்றுகொண்டார்.

இந்நிலையில், காங்கிரஸ் எம்.எல்.ஏ-க்களில் 12பேர் ஆளும் ராஷ்ட்ரிய சமிதியில் இணைய முடிவு செய்துள்ளதாக தகவல் வெளியாகியுள்ளது.

டி.ஆர்.எஸ்-சில் இணைத்துக் கொள்ளுமாறு 12 காங்கிரஸ் எம்.எல்.ஏ-க்கள் சபாநாயகர் பி. ஸ்ரீநிவாச ரெட்டியை சந்தித்து கோரிக்கை விடுத்துள்ளதாகவும் தகவல் தெரிவிக்கப்பட்டுள்ளது.