“வாழ்த்து மழைக்கு அன்பும், நன்றியும்!” : துணை முதலமைச்சர் உதயநிதி ஸ்டாலின் நெகிழ்ச்சி!

தனது பிறந்தநாளையொட்டி வாழ்த்து தெரிவித்த அனைவருக்கும் நன்றி தெரிவித்து அறிக்கை வெளியிட்டுள்ளார் துணை முதலமைச்சர் உதயநிதி ஸ்டாலின். அதில் அவர் தெரிவித்தது பின்வருமாறு,

“எனது பிறந்தநாளில் நேற்று முன் தினம் முதல் இடைவிடாத வாழ்த்து மழையில் நனைந்தேன். தமிழ்நாடு முழுவதும் இருந்து சென்னை வந்திருந்த உடன்பிறப்புகள் உங்களின் எல்லையில்லா அன்பினால் என்னை திக்குமுக்காடச் செய்துவிட்டீர்கள்.

தமிழ்நாட்டின் எட்டுத்திக்கிலிருந்தும் வந்த உங்கள் வாழ்த்தொலி இந்த பிறந்த நாளையும் சிறந்த நாளாக்கி இருக்கிறது. என்னை வாழ்த்துவதற்காக பல்லாயிரக்கணக்கில் சென்னைக்கு வருகை தந்த கழக உடன்பிறப்புகள் பத்திரமாக இல்லம் திரும்பி இருப்பீர்கள் என்று நம்புகிறேன்.

பிறந்த நாளையொட்டி, கழகத்தலைவர் - மாண்புமிகு முதலமைச்சர் அவர்கள் நம்மை வாழ்த்தியதோடு மட்டுமின்றி, இளைஞரணியின் செயலாளராக – விளையாட்டுத்துறையின் அமைச்சராக – துணை முதலமைச்சராக நம் பணிகளை போற்றி பாராட்டியதை எண்ணி மகிழ்ந்தேன்.

தந்தையாகவும் – தலைவராகவும் வாழ்த்தி வழிகாட்டிய நம் முதலமைச்சர் அவர்களுக்கு இந்த நேரத்தில் என் நன்றியை உரித்தாக்குகிறேன்.

மாண்புமிகு அமைச்சர் பெருமக்கள், தலைமைக்கழக நிர்வாகிகள், மாவட்டக்கழகச் செயலாளர்கள், ஒன்றிய – நகர – பகுதி – பேரூர் – கிளைக்கழகச் செயலாளர்கள் - இளைஞரணியின் மாநில துணைச் செயலாளர்கள், மாவட்ட – மாநகர அமைப்பாளர்கள் – துணை அமைப்பாளர்கள் மற்றும் இளைஞரணி தம்பிமார்கள், பல்வேறு அணிகளின் பொறுப்பாளர்கள் என முத்தமிழ் அறிஞர் கலைஞர் அவர்களின் உடன்பிறப்புகள் அனைவரும் என்னிடம் காட்டியது கழக பாசத்தையும் விஞ்சிய குடும்பப் பாசம் என்பதை உளப்பூர்வமாக உணர்ந்தேன்.

எனது வேண்டுகோளை ஏற்று மாநிலம் முழுவதும் ஏழை எளிய மக்களுக்கு நலத்திட்ட உதவிகளை வழங்கி ஆக்கப்பூர்வமான முறையிலும் கொள்கை வழியிலும் நிகழ்ச்சிகளை நடத்திவரும் கழக உடன்பிறப்புகள் ஒவ்வொருவருக்கும் எனது நன்றிகள்.

தேடித்தேடி வாங்கிய புத்தகங்கள், கருப்பு – சிவப்பு வேட்டி – விளையாட்டு உபகரணங்கள் – சட்டமன்றத் தேர்தலுக்கான நிதி – இளைஞர் அணி வளர்ச்சி நிதி - மகளிர் சுய உதவிக் குழுக்களின் தயாரிப்பு பொருட்கள், நினைவலைகளை எழுப்பும் புகைப்படங்கள் என நீங்கள் வழங்கிய பிறந்தநாள் பரிசுகள் எனது மனதை நிறைத்திருக்கிறது.

அதே போல நேரில் வாழ்த்திய மக்கள் நீதி மய்யம் தலைவரும் – மாநிலங்களைவை உறுப்பினருமான கலைஞானி கமல் சாருக்கும், விடுதலை சிறுத்தைகள் கட்சியின் தலைவர் – நாடாளுமன்ற உறுப்பினர் எழுச்சித்தமிழர் அண்ணன் திருமாவளவன் அவர்களுக்கும், தொலைபேசியில் என்னை வாழ்த்திய சூப்பர் ஸ்டார் ரஜினிகாந்த் சார் உட்பட அனைவருக்கும் என் நன்றி.

வாழ்த்துச் செய்தியாகவும், சமூக வலைத்தளங்களிலும் என்னை வாழ்த்திய தோழமை இயக்கத்தின் தலைவர்கள், நிர்வாகிகளுக்கு என்னுடைய நன்றி.

என்னை நேரில் சந்தித்து வாழ்த்திய தமிழ்நாடு அரசின் அதிகாரிகள் – காவல் துறை அதிகாரிகள் உட்பட அனைவருக்கும் என் நன்றி. அன்பு ததும்பும் வாழ்த்துகளில் என்னை நெகிழ வைத்த திரையுலக உறவுகளுக்கும், நண்பர்களுக்கும் நன்றிகள் பல!

தந்தை பெரியார் – பேரறிஞர் அண்ணா – முத்தமிழறிஞர் கலைஞர் நினைவிடங்களிலும், கோபாலபுரம், சி.ஐ.டி காலனி இல்லங்களிலும் திரண்டு வந்து வாழ்த்திய பொதுமக்கள் உட்பட அனைத்து தரப்பினருக்கும் எனது நன்றி.

பெரியார் திடலில் என் பிறந்த நாளையொட்டி கழக மூத்த முன்னோடிகளுக்கு பொற்கிழி உட்பட பல்வேறு நலத்திட்ட உதவிகள் வழங்கும் விழாவை ஏற்பாடு செய்து, அதில் என்னை பங்கேற்கச் செய்த சென்னை கிழக்கு மாவட்டக்கழகச் செயலாளர் – அமைச்சர் அண்ணன் சேகர்பாபு அவர்களுக்கும் என் நன்றி!

அதே போல நம்முடைய சேப்பாக்கம் – திருவல்லிக்கேணி தொகுதி, இராயப்பேட்டையில் உள்ள மாநகராட்சி வீடற்றோர் காப்பகத்துக்கும் மற்றும் நுங்கம்பாக்கம் எஸ்.பி.பாலசுப்பிரமணியம் பிரதான சாலை பகுதியில் உள்ள மாற்றுத்திறனாளிகள் இல்லத்துக்கும் என் மகளோடு சென்று, கேக் வெட்டி கொண்டாடியது மன நிறைவைத் தந்தது.

அங்கிருந்த மாற்றுத்திறன் சகோதரிகளும் – பாட்டிகளும் உள்ளன்போடு வாழ்த்தியது நெகிழ்ச்சியாக இருந்தது. அவர்களுக்கு என் நன்றி. இந்த சந்திப்பை ஒருங்கிணைத்த சென்னை மேற்கு மாவட்டக் கழகச் செயலாளர் சகோதரர் நே.சிற்றரசு அவர்களுக்கு என் நன்றி.

குறிஞ்சி இல்லத்தில் விழா ஏற்பாடுகளைச் செய்த சென்னை மேற்கு மாவட்டக் கழகச் செயலாளர் அண்ணன் மயிலை த.வேலு அவர்களுக்கும், அவருக்கு துணை நின்ற மாவட்டக்கழக நிர்வாகிகளுக்கும் – இளைஞரணியினர் – குறிஞ்சி இல்ல பணியாளர்கள் அனைவருக்கும் என் நன்றி.

அதே போல, பாதுகாப்பு ஏற்பாடுகளை மிகச்சிறப்பாக செய்திருந்த காவல் துறையினருக்கும் என் நன்றி.

தமிழ்நாட்டின் முன்னேற்றத்துக்கும் உரிமைகளுக்கும் இன்னும் கடுமையாக உழைப்பது தான் உங்களது அளவிலா அன்பிற்கு நான் செய்யும் கைமாறாக இருக்கும்.

கழகத்தலைவர் அவர்கள் கூறியுள்ள பிறந்தநாள் அறிவுரையின்படி, மக்களுக்காக களத்தில் நிற்பதும் - திராவிட இயக்கக் கருத்தியலை பரப்புவதும் என்கிற பணிகளை இன்னும் வேகமாக தொடர்வோம்.

இந்த பிறந்த நாளில் நான் எத்தனையோ பரிசுகளை பெற்றிருந்தாலும், 2026-ல் கழகம் 7-ஆவது முறையாக வென்றது. கழகத்தலைவர் அவர்கள் தொடர்ந்து 2-ஆவது முறையாக முதலமைச்சர் ஆனார்கள் என்ற வரலாற்றை படைப்பதே நான் எதிர்பார்க்கும் மாபெரும் பரிசு.

அந்த இலக்கை நோக்கி உடன்பிறப்புகள் நாம் ஒற்றுமையுடன் கரம்பற்றி நடைபோடுவோம். வாழ்த்துகளைக் குவித்த அனைவருக்கும் எனது அன்பும் நன்றியும்!

வெல்வோம் இருநூறு! படைப்போம் வரலாறு!!”