”2026-தேர்தலிலும் தி.மு.க உடன் தான் கூட்டணி” : வி.சி.க தலைவர் தொல்.திருமாவளவன் திட்டவட்டம்!

2026-தேர்தலிலும் தி.மு.க உடன் தான் கூட்டணி தொடரும். தி.மு.க தலைமையிலான கொள்கை கூட்டணியை விட்டுவிட்டு இன்னொரு கூட்டணிக்கு செல்ல வேண்டும் என்ற தேவை எங்களுக்கு இல்லை என வி.சி.க தலைவர் தொல்.திருமாவளவன் திட்டவட்டமாக தெரிவித்துள்ளார்.

திருச்சியில் செய்தியாளர்களிடம் பேசிய தொல்.திருமாவளவன், ”நாங்கள் தொடர்ந்து தி.மு.க கூட்டணியில் தான் இருந்து வருகிறோம். தி.மு.க தலைமையிலான கொள்கை கூட்டணியை விட்டுவிட்டு இன்னொரு கூட்டணிக்கு செல்ல வேண்டும் என்ற தேவை எங்களுக்கு இல்லை. ஏற்கனவே அதை நான் பலமுறை சுட்டிக்காட்டி உள்ளேன். வேண்டுமென்று சிலர் பரப்பும் பொய் செய்திகளை நான் முற்றிலுமாக மறுத்து வருகிறேன். 2026-ல் நடைபெறும் சட்டமன்றத் தேர்தலிலும் எங்கள் கூட்டணி தொடரும்.

திராவிடத்தால் யாரும் வீழவில்லை திராவிடத்தால் வாழ்ந்தோம் வரலாறு படைத்தோம் என்பதே உண்மை. சாதியம் தான் நம்மளை பிளவுபடுத்தி, வீழ்த்தியுள்ளது. சாதியத்தை எதிர்க்க வேண்டும் என்றால் ஆரியத்தை எதிர்க்க வேண்டும்.

திராவிடம் என்பது சாதிய கருத்துகளுக்கு எதிராக பேசும் அரசியல். திராவிடம் கருத்தியல் இல்லை என்றால் சனாதனம் நம்மளை விழுங்கி இருக்கும். ஹிந்தி தமிழை விழுங்கி இருக்கும்" என தெரிவித்துள்ளார்.