உலகக்கோப்பை கிரிக்கெட் 2019: ஆப்கானிஸ்தானை எதிர்கொள்கிறது இந்திய அணி!

இங்கிலாந்தில் நடைபெற்று வரும் 2019ம் ஆண்டுக்கான உலகக்கோப்பை கிரிக்கெட் போட்டியில் இந்திய அணி இதுவரை 4 ஆட்டங்களில் 3 போட்டிகளில் வெற்றி பெற்றுள்ளது. தற்போது தனது, ஐந்தாவது ஆட்டத்தில் ஆப்கானிஸ்தான் அணியை எதிர்கொள்ள இருக்கிறது.

தென் ஆப்பிரிக்கா, ஆஸ்திரேலியா, பாகிஸ்தான் அணிகளுடனான போட்டியில் இந்திய அணி அபார வெற்றிபெற்றது. நியூஸிலாந்துக்கு எதிரான ஆட்டம் மட்டும் மழையால் ரத்து செய்யப்பட்டது.

பேட்டிங், பந்துவீச்சு, ஃபீல்டிங் என அனைத்திலும் இந்திய அணி வலுவான அணியாக உள்ளது. இன்றைய லீக் போட்டி சவுத்தாம்ப்டன் நகரில் உள்ள ரோஸ் பவுல் மைதானத்தில் பிற்பகல் 3 மணிக்கு தொடங்குகிறது.

ஆப்கானிஸ்தானுக்கு எதிரான போட்டியில் புவனேஷ்வர் குமாருக்கு பதில் முகமது ஷமி விளையாடவுள்ளார். இதுவரை போட்டியிட்ட 5 ஆட்டங்களிலும் ஆப்கானிஸ்தான் அணி தோல்வியடைந்திருக்கிறது.

இதனால் ஒரு வெற்றியை கூட பதிவு செய்யாத ஆப்கானிஸ்தான் அணி புள்ளி பட்டியலில் கடைசி இடத்தில் உள்ளது.