2வது முறையாக நடிப்பிற்காக தேசிய விருதை வென்ற தனுஷ்... தேசிய திரைப்பட விருதுகள் பட்டியல் அறிவிப்பு!

ஒவ்வோர் ஆண்டும் ஏப்ரல் மாதம் தேசிய திரைப்பட விருதுகள் அறிவிக்கப்படும். கடந்த ஆண்டு கொரோனா அச்சுறுத்தல் காரணமாக தேசிய விருதுகள் அறிவிக்கப்படாத நிலையில், 2019ஆம் ஆண்டுக்கான, 67வது தேசிய திரைப்பட விருதுகள் இன்று அறிவிக்கப்பட்டுள்ளன.

வெற்றிமாறன் இயக்கத்தில் தனுஷ் நடிப்பில் வெளியான 2019ல் வெளியான ‘அசுரன்’ திரைப்படத்திற்கு தேசிய விருது அறிவிக்கப்பட்டுள்ளது.

மேலும், சிறந்த நடிகருக்கான தேசிய விருது நடிகர் தனுஷுக்கு அறிவிக்கப்பட்டுள்ளது. இது நடிப்பிற்காக தனுஷ் பெறும் இரண்டாவது விருதாகும்.

சிறந்த துணை நடிகருக்கான தேசிய விருது ‘சூப்பர் டீலக்ஸ்’ படத்திற்காக விஜய் சேதுபதிக்கு அறிவிக்கப்பட்டுள்ளது. ‘விஸ்வாசம்’ படத்திற்காக இசையமைப்பாளர் இமானுக்கு தேசிய விருது அறிவிக்கப்பட்டுள்ளது.

பார்த்திபன் இயக்கி நடித்து வெளியான ‘ஒத்த செருப்பு’ படத்திற்கு சிறப்பு தேசிய விருது அறிவிக்கப்பட்டுள்ளது. ‘ஒத்த செருப்பு’ திரைப்படத்தின் ஒலிப்பதிவாளர் ரசூல் பூக்குட்டி சிறந்த ஒலிப்பதிவாளர் விருது பெறுகிறார்.

சிறந்த குழந்தை நட்சத்திரத்திற்கான தேசிய விருது நாக விஷாலுக்கு, ‘கேடி என்கிற கருப்புதுரை’ திரைப்படத்தில் நடித்ததற்காக அறிவிக்கப்பட்டுள்ளது.