திருவள்ளுவர் சிலைக்கு காவி துண்டு, ருத்ராட்ச மாலை அணிவித்த அர்ஜூன் சம்பத் கைது!

தஞ்சை மாவட்டம் வல்லம் பகுதியில் உள்ள பிள்ளையார்பட்டியில் திருவள்ளுவர் சிலை ஒன்று உள்ளது. இந்தச் சிலையை நவம்பர் 4-ம் தேதியன்று சமூகவிரோதிகள், திருவள்ளுவர் திருவுருவச் சிலை மீது சாணத்தையும், கருப்பு மையமும் பூசிவிட்டுச் சென்றுள்ளனர்.

திருவள்ளுவர் சிலையை அவமதிக்கும் வகையில் நடந்த சமூக விரோதிகளின் இந்தச்செயலுக்கு தமிழ் ஆர்வலர்கள், தி.மு.க உள்ளிட்ட கட்சியினர் மற்றும் ஜனநாயக அமைப்பினர் கடும் கண்டனம் தெரிவித்திருந்தனர். அரசியல் கட்சி தலைவர்களும் எதிர்ப்பு தெரிவித்து வந்தனர்.

போலிஸார் இதுகுறித்து வழக்குப் பதிவு செய்து மேலும் சிலையை சேதப்படுத்தி சமூகவிரோத செயலில் ஈடுபட்ட குற்றவாளிகள் யார் என்பது குறித்து தீவிரமாக விசாரணை நடத்தி வருகின்றனர்.

இந்நிலையில், அனுமதியின்றி திருவள்ளுவர் சிலைக்கு காவி துண்டு, ருத்ராட்ச மாலை அணிவித்த குற்றசாட்டில் அர்ஜூன் சம்பத் கைது செய்யப்பட்டுள்ளார். கைது செய்யப்பட்ட அர்ஜூன் சம்பத்தை தஞ்சை காவல் கண்காணிப்பாளர் அலுவலகத்துக்கு அழைத்துச் சென்றுள்ளனர்.

காவல்துறையினர் முன்னிலையில் வழிபட அனுமதித்து விட்டு பின்னர் கைது செய்து காவல்துறையினர் நாடகமாடுவதாக தமிழ் ஆர்வலர்கள் கண்டனம் தெரிவிக்கின்றனர்.