”பா.ஜ.க போன்ற சில்லறை கட்சிகளுக்குப் பதிலளிக்க முடியாது” : அமைச்சர் டி.ஆர்.பி ராஜா அதிரடி!

கோவை மக்களவை தொகுதியில் இந்தியா கூட்டணி தலைமையில் தி.மு.க வேட்பாளர் கணபதி ராஜ்குமார் போட்டியிடுகிறார். இந்நிலையில் கோவை மாவட்டம், சூலூர் அடுத்த கண்ணம் பாளையத்தில் வேட்பாளர் அறிமுக கூட்டம் நடைபெற்றது. இதில் அமைச்சர் டி.ஆர்.பி ராஜா மற்றும் இந்தியா கூட்டணிக் கட்சிகளைச் சேர்ந்த நிர்வாகிகள் கலந்து கொண்டனர்.

பின்னர் செய்தியாளர்களைச் சந்தித்த அமைச்சர் டி.ஆர்.பி ராஜா," தி.மு.க கோவையில் அமோக வெற்றி பெரும். தி.மு.கவை எதிர்த்துப் போட்டியிடும் அனைத்து வேட்பாளர்களும் டெபாசிட் இழப்பார்கள்" என தெரிவித்தார்.

அப்போது, கோவையில் வெப்பம் அதிகமாக இருப்பதற்கு தி.மு.கதான் காரணம் என பா.ஜ.க தலைவர் கருத்து குறித்து கேள்வி எழுப்பினர். இதற்கு அமைச்சர் டி.ஆர்.பி ராஜா, "பா.ஜ.க போன்ற சில்லறை கட்சிகளுக்குப் பதிலளிக்க எங்களுக்கு நேரமில்லை. பிரதான எதிர்க்கட்சியான அ.தி.மு.க குறித்து கேள்வி கேளுங்கள்" என்றார்.