முதல் தேர்தலிலேயே அசத்திய PhD பட்டதாரி... எதிர்த்துப் போட்டியிட்ட அத்தனை பேருக்கும் டெபாசிட் காலி!

ஸ்ரீபெரும்புதூரில் 27 வயதான பிஎச்.டி பட்டதாரியான தி.மு.க வேட்பாளர் தான் சந்தித்த முதல் தேர்தலிலேயே தன்னை எதிர்த்துப் போட்டியிட்ட அனைவரையும் டெபாசிட் இழக்கச் செய்துள்ளார்.

தமிழ்நாட்டின் 9 மாவட்டங்களில் இரண்டு கட்டங்களாக ஊரக உள்ளாட்சித் தேர்தல் நடைபெற்று முடிந்த நிலையில், நேற்று காலை முதல் வாக்கு எண்ணிக்கை நடைபெற்றது.

காஞ்சிபுரம் மாவட்டம் ஸ்ரீபெரும்புதூர் ஒன்றியத்தில் நடைபெற்று முடிந்த உள்ளாட்சித் தேர்தலில் 10-ஆவது வார்டு ஒன்றியக் கவுன்சிலர் பதவிக்கு 27 வயதான பிஎச்.டி பட்டதாரி அந்தோணி வினோத்குமார் தி.மு.க சார்பில் போட்டியிட்டார்.

அ.தி.மு.க கூட்டணி சார்பில் பா.ஜ.க-வைச் சேர்ந்த பாபு போட்டியிட்டார். இவரை ஆதரித்து தமிழக பா.ஜ.க தலைவர் அண்ணாமலை தீவிர பிரச்சாரம் மேற்கொண்டு வாக்கு சேகரித்தார்.

இந்நிலையில், ஆண்டனி வினோத்குமார் 1,976 வாக்குகள் பெற்று அமோக வெற்றி பெற்றார்.இவரை எதிர்த்து போட்டியிட்ட பா.ஜ.க வேட்பாளர் உட்பட 8 பேரும் டெபாசிட் இழந்தனர்.

பிஎச்.டி பட்டதாரியான அந்தோணி வினோத்குமார் சந்திக்கும் முதல் தேர்தல் இது. இதில் இவர் தன்னை எதிர்த்துப் போட்டியிட்ட 8 பேரையும் டெபாசிட் இழக்கச் செய்துள்ளது அனைத்து தரப்பினர் மத்தியிலும் பாராட்டைப் பெற்றுள்ளது.