சச்சின் தேடிய ஓட்டல் ஊழியர் இவர்தான்!

இந்திய அணியின் முன்னாள் நட்சத்திர வீரர் சச்சின் டெண்டுல்கர் ட்விட்டர் வாயிலாக ரசிகர்களிடம் ஒரு உதவி கேட்டு இருந்தார்.

சென்னையில் நடந்த ஒரு டெஸ்ட் தொடரின்போது, ஹோட்டல் ஊழியர் ஒருவர் சொன்ன ஆலோசனை, தனது பேட்டிங் ஸ்டைலில் மாற்றம் தந்ததாகவும் இப்போது அவரை கண்டுபிடிக்க உதவ வேண்டும் என கூறி வீடியோ ஒன்றை சச்சின் வெளியிட்டிருந்தார்.

இந்நிலையில், சச்சின் டெண்டுல்கருக்கு ஆலோசனை வழங்கிய ஓட்டல் ஊழியர் சென்னை பெரியார் நகரைச் சேர்ந்த குருபிரசாத் என தெரியவந்துள்ளது.

இதுகுறித்து கலைஞர் செய்திகள் தொலைகாட்சிக்கு அளித்த பேட்டியில், ”சச்சினின் பேட்டிங்கை பார்ப்பது மிகுந்த சந்தோஷமாக இருக்கும். நான் அவரது Elbow Guard-ல் ஒரு சிறிய மாற்றம் செய்வது குறித்து அவரிடம் கூறினேன். அதற்கு அவர் அதை மாற்றிக் கொள்வதாக கூறினார். அவ்வளவு தான் வேறு எதுவும் நான் பேசவில்லை.

ஆனால், 19 ஆண்டுகளுக்கு பிறகு நான் கூறியதை சச்சின் நினைவு கூர்ந்திருப்பது மிகுந்த மகிழ்ச்சியளிக்கிறது. அவரை சந்திக்க மிகுந்த ஆர்வமாக இருக்கிறேன். இருப்பினும், சச்சின் எங்கள் வீட்டிற்கு வந்து விருந்து உண்டு சென்றால் மிகுந்த மகிழ்ச்சியாக இருக்கும்” பூரிக்கிறார் குரு பிரசாத்.