மோடியின் 5 ஆண்டு ஆட்சியில் சுற்றுப்பயண செலவு ரூ.393 கோடி : RTI-ல் வெளியான அதிர்ச்சி தகவல்

தகவல் அறியும் உரிமை சட்டத்தின் கீழ் பிரதமர் மோடி மற்றும் மத்திய அமைச்சர்கள் 2014-ம் ஆண்டு மே மாதம் முதல் மேற்கொண்ட வெளிநாடு, உள்நாட்டு சுற்றுப்பயணங்களில் செய்த செலவு விவரங்களை மும்பையைச் சேர்ந்த ஒருவர் கோரி இருந்தார்.

அதன் அடைப்படையில் அவருக்கு பதில் அளிக்கப்பட்டுள்ளது. அதில் தெரிவிக்கப்பட்டிருந்ததாவது : பிரதமர் நரேந்திர மோடி மற்றும் மத்திய அமைச்சரவையில் உள்ள அமைச்சர்கள் 2014-15-ம் நிதியாண்டு முதல் 2018- 19-ம் நிதியாண்டு வரை மேற்கொண்ட வெளிநாடு மற்றும் உள்நாட்டு சுற்றுப் பயணங்களில் மொத்தம் ரூ.393.58 கோடி செலவிடப்பட்டுள்ளது. பிரதமர் மோடி மற்றும் மத்திய அமைச்சர்கள் வெளிநாட்டு சுற்றுப்பயணங்களுக்கு ரூ.263 கோடியும், உள்நாட்டு சுற்றுப்பயணங்களுக்கு ரூ.48 கோடியும் செலவிட்டுள்ளனர்.

மத்திய இணை அமைச்சர்கள் வெளிநாட்டுப் பயணங்களுக்கு ரூ.29 கோடியும், உள்நாட்டுப் பயணங்களுக்கு ரூ.53 கோடியும் செலவு செய்துள்ளனர். இதில் அதிகபட்சமாக கடந்த 2014-15ம் நிதியாண்டில் மட்டுமே பிரதமர் மோடி மற்றும் மத்திய அமைச்சர்கள் வெளிநாடு, உள்நாட்டு பயணங்களின் போது ரூ.88 கோடி செலவிட்டுள்ளதாக அதில் தெரிவிக்கப்பட்டுள்ளது.

பிரதமர் அலுவலக இணையதளத்தில் வெளியிடப்பட்டுள்ள செய்தியில், “கடந்த 2014-ம் ஆண்டு மே மாதம் முதல் 2019-ம் ஆண்டு பிப்ரவரி மாதம் வரையிலும் மோடி 49 வெளிநாட்டு சுற்றுப்பயணங்களை மேற்கொண்டிருப்பதாகத் தெரிவிக்கப்பட்டுள்ளது குறிப்பிடத்தக்கது.