Tamilnadu
பெண் ஊழியர்கள் உடை மாற்றுவதை வீடியோ எடுத்த பெட்ரோல் பங்க்? : தட்டிக்கேட்ட ஊழியர் மீது தாக்குதல்!
கோவை மாவட்டம் சாய்பாபா காலனி அருகேயுள்ள ரூட்ஸ் நிறுவனத்தின் பெட்ரோல் பங்க் ஒன்று உள்ளது. இந்த பங்க்கில் கோவை கண்ணப்பநகர் பகுதியைச் சேர்ந்த மணிகண்டன் மற்றும் அவரது மனைவி உட்பட பத்துக்கும் மேற்பட்டவர்கள் பணியாற்றுகின்றனர்.
இந்நிலையில் கடந்த 4 மாதங்களுக்கு முன்பு பெட்ரோல் பங்க்கில் பெண்கள் உடைமாற்றும் அறையில் சூப்பர்வைசர் சுபாஷ் ரகசிய கேமரா வைத்து வீடியோ எடுத்துள்ளார். இந்தச் சம்பவம் தெரியவந்ததை அடுத்து சுபாஷை பணியில் இருந்து நீக்கியுள்ளார்.
இந்த சம்பவத்தை மணிகண்டன் தான் வெளியில் கொண்டுவந்ததாகவும், அதனால் நிர்வாகம் அவரைப் பழிவாங்கும் நோக்கத்தில் இருந்ததாகவும் தெரிகிறது. இந்நிலையில் சுபாஷ் எடுத்த ரகசிய வீடியோ வெளியாகியுள்ளது. இதனால் ஆத்திரமடைந்த மணிகண்டன் இதுதொடர்பாக சம்பந்தப்பட்ட அதிகாரிகளிடம் வீடியோ வெளியானது எப்படி எனக் கேள்வி எழுப்பியுள்ளார்.
ஆனால் பங்க் நிர்வாகம் முறையாக பதில் அளிக்காததால், வாக்குவாதம் ஏற்பட்டுள்ளது. இந்த வாக்குவாதத்தின் போது பங்க் நிறுவன அதிகாரியான கவிதாசன், மேலாளர் சங்கர்கணேஷ் உள்ளிட்டோர் மணிகண்டனைத் தாக்கியுள்ளனர்.
இதையடுத்து மணிகண்டன் கோவை அரசு மருத்துவமனையில் சிகிச்சை பெற்று வருகிறார். மேலும் தன் மீது நிறுவனத்தைச் சேர்ந்தவர்கள் காவல்துறையில் பொய் புகார் அளித்துள்ளதாகவும் சிகிச்சை பெறும் மணிகண்டன் தெரிவித்துள்ளார்.
இது குறித்து ரூட்ஸ் நிறுவனத்தினர் மணிகண்டனை தாக்கவில்லை என்றும், 4 மாதங்களுக்கு முன்பு நடந்த பிரச்னைக்கும் இந்த பிரச்னைக்கும் எந்தவித தொடர்பும் இல்லை என்றும் கூறியுள்ளனர்.
மேலும் போலிஸார் தரப்பில் கூறும்போது, ரூட்ஸ் நிறுவனத்தினர் வீடியோ எடுத்ததாக யாரும் இதுவரை புகார் அளிக்கவில்லை. தற்போது இந்தச் சம்பவத்திற்கு பிறகே தெரியவந்துள்ளது. இதுதொடர்பாக உரிய விசாரணை நடத்தி சம்பந்தப்பட்டவர்கள் மீது நடவடிக்கை எடுப்பதாகத் தெரிவித்துள்ளனர்.
Also Read
-
“நீதித்துறையின் மீது மக்களுக்கு நம்பிக்கை குறைந்து வருகிறது” -முன்னாள் நீதிபதி பிரபா ஸ்ரீதேவன் வருத்தம்!
-
5வது மாடியில் இருந்து வீசப்பட்ட பேச்சிளம் குழந்தை... தாயை அதிரடியாக கைது செய்த போலீஸ் -விசாரணையில் பகீர்!
-
காணாமல் போன மோடி : காணவில்லை என சுவரொட்டி அடித்த மணிப்பூர் மக்கள்!
-
பிரசாரத்துக்கு சென்ற பாஜக வேட்பாளருக்கு எதிர்ப்பு: சம்பவ இடத்திலேயே விவசாயி பரிதாப பலி -குவியும் கண்டனம்!
-
“பெண்கள் என்றால் எதை வேண்டுமானாலும் பேசலாமா ?” - சவுக்கு மீடியா சங்கருக்கு மகளிர் காங்கிரஸ் கண்டனம் !