தேர்தல் பணியில் உயிரிழந்த 6 ராணுவ வீரர்கள் : தேர்தல் ஆணையத்தை விமர்சிக்கும் நெட்டிசன்கள் !

இந்தியாவில் நாடாளுமன்றத் தேர்தல் ஏப்ரல் 19 ஆம் தேதி தொடங்கி ஜூன் 1 ஆம் தேதி வரை 7 கட்டமாக நடைபெறும் என தேர்தல் ஆணையம் அறிவித்தது. இதில் தமிழ்நாடு போன்ற முதற்கட்ட தேர்தல் ஏப்ரல் 19 ஆம் தேதி நடைபெற்ற நிலையில், 7 கட்ட வாக்குப்பதிவு இன்று நடைபெற்றது.

இந்த தேர்தலில் பதிவான வாக்குகள் ஜூன் 4 ஆம் தேதி வாக்குகள் எண்ணப்பட்டு முடிவுகள் அறிவிக்கப்பட உள்ளது. வழக்கத்துக்கு மாறாக இந்த நாடாளுமன்ற தேர்தலை 7 கட்டமாக நடத்த முடிவு செய்த தேர்தல் ஆணையத்தின் செயல் ஆரம்பத்தில் இருந்தே விமர்சிக்கப்பட்டது.

இந்த தேர்தல் பணிக்காக ஆயிரக்கணக்கான ராணுவ வீரர்கள் நாடு முழுவதும் தொடர்ந்து பணியமர்த்தப்பட்டனர். இப்படி பணியில் அமர்த்தப்பட்ட ராணுவ வீரர்கள் 6 பேர் தற்போது உயிரிழந்துள்ளது நாடு முழுவதும் அதிர்ச்சியை ஏற்படுத்தியுள்ளது.

உத்தரப் பிரதேசம் மிர்ஷாபூரில் தேர்தல் பணியில் ஈடுபட்டிருந்த 23 ராணுவ வீரர்களில் 8 பேர் அடுத்தடுத்து மயக்கமடைந்து மருத்துவமனையில் அனுமதிக்கப்பட்டனர். இதில் 6 பேர் உயிரிழந்த நிலையில், 2 பேருக்கு தீவிர சிகிச்சை அளிக்கப்பட்டு வருகிறது.

வடமாநிலங்களில் கடும் வெப்பம் பதிவாகி வரும் நிலையில், ராணுவ வீரர்களுக்கு போதிய ஏற்பாடுகள் செய்யப்படாததே இந்த உயிரிழப்புக்கு காரணம் என விமர்சனம் எழுந்துள்ளது. இந்த ராணுவ வீரர்களுக்கு அதிக காய்ச்சல் இருந்ததாக அதிகாரிகள் தெரிவித்துள்ளனர்.