‘உங்கள நம்ப முடியாது’ - பீஸ்ட் பட அப்டேட் வீடியோவில் அனிருத், நெல்சனை கலாய்த்த நடிகர் விஜய்!

விஜய்யின் 65வது படமாக உருவாகி வருகிறது பீஸ்ட். நெல்சன் திலீப்குமார் இயக்கத்தில் பூஜா ஹெக்டே, செல்வராகவன், யோகி பாபு, ரெடின் கிங்ஸ்லி உள்ளிட்ட பலரும் நடித்துள்ளனர்.

சன் பிக்சர்ஸ் தயாரிப்பில் அனிருத் இசையில் படமாக்கப்பட்ட பீஸ்ட் ஏப்ரல் 14ம் தேதி திரையரங்குகளில் வெளியாகும் என பரவலாக தெரிவிக்கப்பட்டுள்ளது. இருப்பினும் தயாரிப்பு நிறுவனம் தரப்பில் ஏப்ரலில் வெளியாகும் என்பதை மட்டுமே தெரிவித்துள்ளது.

இப்படி இருக்கையில், படத்தின் புரோமோஷன் உள்ளிட்ட பிற வேலைகளில் படக்குழு மும்முரமாக ஈடுபட்டு வருகிறது.

அதன்படி பீஸ்ட் படத்தின் முதல் சிங்கிள் வெளியீட்டு தொடர்பான வீடியோவை வெளியிட்டு விஜய் ரசிகர்களை படக்குழு குஷிப்படுத்தியிருக்கிறது.

டாக்டர் பட பாடல் வெளியீட்டு பாணியிலேயே இந்த அப்டேட்டையும் நெல்சன், அனிருத் மற்றும் சிவகார்த்திகேயன் தங்களுக்கே உரிய பாணியில் கொடுத்துள்ளனர்.

அதன்படி ‘அரபிக் குத்து’ என்ற புதுவகை பாடலை இயற்றியிருப்பதாக கூறியுள்ளனர். இந்த பாடல் எதிர்வரும் பிப்ரவரி 14ம் தேதி வெளியாகும் எனவும் தெரிவிக்கப்பட்டுள்ளது.

சிவகார்த்திகேயனின் வரிகளில் உருவாகியுள்ள இந்த பாடலை நடிகர் விஜய்யே பாடியிருப்பாரா என்ற எதிர்ப்பார்ப்பில் ரசிகர்கள் காத்திருக்கின்றனர்.